Nikussenan nameshat anite shakaikanit kie anite shipit, ne peiku e uinakanit utshashumeku, miam urne kushkan eshinakuak, iapit mishtiku e apashtakanit ka mukutakanit mak e tshinapishkat ushkan e apashtakanit anite mishtikut.
Kueshpiati tekuatshiki kie pepuki, nipimishkanan anite shipua mak nikapatanan, nutinenan nutshimiu-mitshim muku ne ua apashtaiat tshe ishpish ne pimipaniat. Pessish etananut nenua shipua anite etat ne utshashumeku, eukuana e apashtaiat nenua uashuakanashkua anite assit ka tshimataht anitshenat kutakat kaikusseht. lapit apashtakanua nenua e natu-atikuepitananut. Ushtikuan-uashuashkanashku iapit tutakatshenanu ushkan e mukutakanit miakupitakanit anite unishkut ka mukutakanit ashit ne ashini kie ma ushkan. Nenua uashuakanashku makupitakanua ashit pishakaniapi. Pishakaniapi makupitakanu anite uashuanashkut ekute uet tshi utshipitakanit ne namesh. Tshika ui pikutau ne auen tshe uepinak uashuakanashkunu, tshetshi eka pikutat anite ashinit, eshku eka makunat nenua utshashumekua pet pekupeniti.
Tshetshi katshitinakanit utshashumeku, ne nitapashtanan uasheshkutuakan anite unishkuat ushkuaiat tshishpitshikamuiakanuat. Ne uasheshkutuakan eukuan tshetshi tshitinak ne utshashumeku. Eshku eka ne shashkaikanit, akutshimakanu anite nipit tshetshi eka tshinipikashit.
